VULC ¹ [Ecce omnia hæc vidit oculus meus,
et audivit auris mea, et intellexi singula.

VULC ² Secundum scientiam vestram et ego novi :
nec inferior vestri sum.

VULC ³ Sed tamen ad Omnipotentem loquar,
et disputare cum Deo cupio :

VULC ⁴ prius vos ostendens fabricatores mendacii,
et cultores perversorum dogmatum.

VULC ⁵ Atque utinam taceretis,
ut putaremini esse sapientes.

VULC ⁶ Audite ergo correptionem meam,
et judicium labiorum meorum attendite.

VULC ⁷ Numquid Deus indiget vestro mendacio,
ut pro illo loquamini dolos ?

VULC ⁸ numquid faciem ejus accipitis,
et pro Deo judicare nitimini ?

VULC ⁹ aut placebit ei quem celare nihil potest ?
aut decipietur, ut homo, vestris fraudulentiis ?

VULC ¹⁰ Ipse vos arguet,
quoniam in abscondito faciem ejus accipitis.

VULC ¹¹ Statim ut se commoverit, turbabit vos,
et terror ejus irruet super vos.

VULC ¹² Memoria vestra comparabitur cineri,
et redigentur in lutum cervices vestræ.

VULC ¹³ Tacete paulisper, ut loquar
quodcumque mihi mens suggesserit.

VULC ¹⁴ Quare lacero carnes meas dentibus meis,
et animam meam porto in manibus meis ?

VULC ¹⁵ Etiam si occiderit me, in ipso sperabo :
verumtamen vias meas in conspectu ejus arguam.

VULC ¹⁶ Et ipse erit salvator meus :
non enim veniet in conspectu ejus omnis hypocrita.

VULC ¹⁷ Audite sermonem meum,
et ænigmata percipite auribus vestris.

VULC ¹⁸ Si fuero judicatus,
scio quod justus inveniar.

VULC ¹⁹ Quis est qui judicetur mecum ?
veniat : quare tacens consumor ?

VULC ²⁰ Duo tantum ne facias mihi,
et tunc a facie tua non abscondar :

VULC ²¹ manum tuam longe fac a me,
et formido tua non me terreat.

VULC ²² Voca me, et ego respondebo tibi :
aut certe loquar, et tu responde mihi.

VULC ²³ Quantas habeo iniquitates et peccata ?
scelera mea et delicta ostende mihi.

VULC ²⁴ Cur faciem tuam abscondis,
et arbitraris me inimicum tuum ?

VULC ²⁵ Contra folium, quod vento rapitur, ostendis potentiam tuam,
et stipulam siccam persequeris :

VULC ²⁶ scribis enim contra me amaritudines,
et consumere me vis peccatis adolescentiæ meæ.

VULC ²⁷ Posuisti in nervo pedem meum,
et observasti omnes semitas meas,
et vestigia pedum meorum considerasti :

VULC ²⁸ qui quasi putredo consumendus sum,
et quasi vestimentum quod comeditur a tinea.]