VULC ¹ [Homo natus de muliere, brevi vivens tempore,
repletur multis miseriis.

VULC ² Qui quasi flos egreditur et conteritur,
et fugit velut umbra, et numquam in eodem statu permanet.

VULC ³ Et dignum ducis super hujuscemodi aperire oculos tuos,
et adducere eum tecum in judicium ?

VULC ⁴ Quis potest facere mundum de immundo conceptum semine ?
nonne tu qui solus es ?

VULC ⁵ Breves dies hominis sunt :
numerus mensium ejus apud te est :
constituisti terminos ejus, qui præteriri non poterunt.

VULC ⁶ Recede paululum ab eo, ut quiescat,
donec optata veniat, sicut mercenarii, dies ejus.

VULC ⁷ Lignum habet spem :
si præcisum fuerit, rursum virescit,
et rami ejus pullulant.

VULC ⁸ Si senuerit in terra radix ejus,
et in pulvere emortuus fuerit truncus illius,

VULC ⁹ ad odorem aquæ germinabit,
et faciet comam, quasi cum primum plantatum est.

VULC ¹⁰ Homo vero cum mortuus fuerit, et nudatus,
atque consumptus, ubi, quæso, est ?

VULC ¹¹ Quomodo si recedant aquæ de mari,
et fluvius vacuefactus arescat :

VULC ¹² sic homo, cum dormierit, non resurget :
donec atteratur cælum, non evigilabit,
nec consurget de somno suo.

VULC ¹³ Quis mihi hoc tribuat, ut in inferno protegas me,
et abscondas me donec pertranseat furor tuus,
et constituas mihi tempus in quo recorderis mei ?

VULC ¹⁴ Putasne mortuus homo rursum vivat ?
cunctis diebus quibus nunc milito, expecto
donec veniat immutatio mea.

VULC ¹⁵ Vocabis me, et ego respondebo tibi :
operi manuum tuarum porriges dexteram.

VULC ¹⁶ Tu quidem gressus meos dinumerasti :
sed parce peccatis meis.

VULC ¹⁷ Signasti quasi in sacculo delicta mea,
sed curasti iniquitatem meam.

VULC ¹⁸ Mons cadens defluit,
et saxum transfertur de loco suo :

VULC ¹⁹ lapides excavant aquæ,
et alluvione paulatim terra consumitur :
et hominem ergo similiter perdes.

VULC ²⁰ Roborasti eum paululum, ut in perpetuum transiret :
immutabis faciem ejus, et emittes eum.

VULC ²¹ Sive nobiles fuerint filii ejus,
sive ignobiles, non intelliget.

VULC ²² Attamen caro ejus, dum vivet, dolebit,
et anima illius super semetipso lugebit.]