VULC ¹ Respondens autem Baldad Suhites, dixit :

VULC ² [Usque ad quem finem verba jactabitis ?
intelligite prius, et sic loquamur.

VULC ³ Quare reputati sumus ut jumenta,
et sorduimus coram vobis ?

VULC ⁴ Qui perdis animam tuam in furore tuo,
numquid propter te derelinquetur terra,
et transferentur rupes de loco suo ?

VULC ⁵ Nonne lux impii extinguetur,
nec splendebit flamma ignis ejus ?

VULC ⁶ Lux obtenebrescet in tabernaculo illius,
et lucerna quæ super eum est extinguetur.

VULC ⁷ Arctabuntur gressus virtutis ejus,
et præcipitabit eum consilium suum.

VULC ⁸ Immisit enim in rete pedes suos,
et in maculis ejus ambulat.

VULC ⁹ Tenebitur planta illius laqueo,
et exardescet contra eum sitis.

VULC ¹⁰ Abscondita est in terra pedica ejus,
et decipula illius super semitam.

VULC ¹¹ Undique terrebunt eum formidines,
et involvent pedes ejus.

VULC ¹² Attenuetur fame robur ejus,
et inedia invadat costas illius.

VULC ¹³ Devoret pulchritudinem cutis ejus ;
consumat brachia illius primogenita mors.

VULC ¹⁴ Avellatur de tabernaculo suo fiducia ejus,
et calcet super eum, quasi rex, interitus.

VULC ¹⁵ Habitent in tabernaculo illius socii ejus qui non est ;
aspergatur in tabernaculo ejus sulphur.

VULC ¹⁶ Deorsum radices ejus siccentur :
sursum autem atteratur messis ejus.

VULC ¹⁷ Memoria illius pereat de terra,
et non celebretur nomen ejus in plateis.

VULC ¹⁸ Expellet eum de luce in tenebras,
et de orbe transferet eum.

VULC ¹⁹ Non erit semen ejus, neque progenies in populo suo,
nec ullæ reliquiæ in regionibus ejus.

VULC ²⁰ In die ejus stupebunt novissimi,
et primos invadet horror.

VULC ²¹ Hæc sunt ergo tabernacula iniqui,
et iste locus ejus qui ignorat Deum.]