VULC ¹ Post hæc aperuit Job os suum, et maledixit diei suo,

VULC ² et locutus est :

VULC ³ [Pereat dies in qua natus sum,
et nox in qua dictum est : Conceptus est homo.

VULC ⁴ Dies ille vertatur in tenebras :
non requirat eum Deus desuper,
et non illustretur lumine.

VULC ⁵ Obscurent eum tenebræ et umbra mortis ;
occupet eum caligo,
et involvatur amaritudine.

VULC ⁶ Noctem illam tenebrosus turbo possideat ;
non computetur in diebus anni,
nec numeretur in mensibus.

VULC ⁷ Sit nox illa solitaria,
nec laude digna.

VULC ⁸ Maledicant ei qui maledicunt diei,
qui parati sunt suscitare Leviathan.

VULC ⁹ Obtenebrentur stellæ caligine ejus ;
expectet lucem, et non videat,
nec ortum surgentis auroræ.

VULC ¹⁰ Quia non conclusit ostia ventris qui portavit me,
nec abstulit mala ab oculis meis.

VULC ¹¹ Quare non in vulva mortuus sum ?
egressus ex utero non statim perii ?

VULC ¹² Quare exceptus genibus ?
cur lactatus uberibus ?

VULC ¹³ Nunc enim dormiens silerem,
et somno meo requiescerem

VULC ¹⁴ cum regibus et consulibus terræ,
qui ædificant sibi solitudines ;

VULC ¹⁵ aut cum principibus qui possident aurum,
et replent domos suas argento ;

VULC ¹⁶ aut sicut abortivum absconditum non subsisterem,
vel qui concepti non viderunt lucem.

VULC ¹⁷ Ibi impii cessaverunt a tumultu,
et ibi requieverunt fessi robore.

VULC ¹⁸ Et quondam vincti pariter sine molestia,
non audierunt vocem exactoris.

VULC ¹⁹ Parvus et magnus ibi sunt,
et servus liber a domino suo.

VULC ²⁰ Quare misero data est lux,
et vita his qui in amaritudine animæ sunt :

VULC ²¹ qui expectant mortem, et non venit,
quasi effodientes thesaurum ;

VULC ²² gaudentque vehementer
cum invenerint sepulchrum ?

VULC ²³ viro cujus abscondita est via
et circumdedit eum Deus tenebris ?

VULC ²⁴ Antequam comedam, suspiro ;
et tamquam inundantes aquæ, sic rugitus meus :

VULC ²⁵ quia timor quem timebam evenit mihi,
et quod verebar accidit.

VULC ²⁶ Nonne dissimulavi ? nonne silui ? nonne quievi ?
et venit super me indignatio.]