VULC ¹ Omiserunt autem tres viri isti respondere Job, eo quod justus sibi videretur.

VULC ² Et iratus indignatusque est Eliu filius Barachel Buzites, de cognatione Ram : iratus est autem adversum Job, eo quod justum se esse diceret coram Deo.

VULC ³ Porro adversum amicos ejus indignatus est, eo quod non invenissent responsionem rationabilem, sed tantummodo condemnassent Job.

VULC ⁴ Igitur Eliu expectavit Job loquentem, eo quod seniores essent qui loquebantur.

VULC ⁵ Cum autem vidisset quod tres respondere non potuissent, iratus est vehementer.

VULC ⁶ Respondensque Eliu filius Barachel Buzites, dixit : [Junior sum tempore, vos autem antiquiores :
idcirco, demisso capite,
veritus sum vobis indicare meam sententiam.

VULC ⁷ Sperabam enim quod ætas prolixior loqueretur,
et annorum multitudo doceret sapientiam.

VULC ⁸ Sed, ut video, spiritus est in hominibus,
et inspiratio Omnipotentis dat intelligentiam.

VULC ⁹ Non sunt longævi sapientes,
nec senes intelligunt judicium.

VULC ¹⁰ Ideo dicam : Audite me :
ostendam vobis etiam ego meam sapientiam.

VULC ¹¹ Expectavi enim sermones vestros ;
audivi prudentiam vestram,
donec disceptaremini sermonibus ;

VULC ¹² et donec putabam vos aliquid dicere, considerabam :
sed, ut video, non est qui possit arguere Job,
et respondere ex vobis sermonibus ejus.

VULC ¹³ Ne forte dicatis : Invenimus sapientiam :
Deus projecit eum, non homo.

VULC ¹⁴ Nihil locutus est mihi :
et ego non secundum sermones vestros respondebo illi.

VULC ¹⁵ Extimuerunt, nec responderunt ultra,
abstuleruntque a se eloquia.

VULC ¹⁶ Quoniam igitur expectavi, et non sunt locuti :
steterunt, nec ultra responderunt :

VULC ¹⁷ respondebo et ego partem meam,
et ostendam scientiam meam.

VULC ¹⁸ Plenus sum enim sermonibus,
et coarctat me spiritus uteri mei.

VULC ¹⁹ En venter meus quasi mustum absque spiraculo,
quod lagunculas novas disrumpit.

VULC ²⁰ Loquar, et respirabo paululum :
aperiam labia mea, et respondebo.

VULC ²¹ Non accipiam personam viri,
et Deum homini non æquabo.

VULC ²² Nescio enim quamdiu subsistam,
et si post modicum tollat me factor meus.]