VULC ¹ Respondens autem Dominus Job de turbine, dixit :

VULC ² [Quis est iste involvens sententias
sermonibus imperitis ?

VULC ³ Accinge sicut vir lumbos tuos :
interrogabo te, et responde mihi.

VULC ⁴ Ubi eras quando ponebam fundamenta terræ ?
indica mihi, si habes intelligentiam.

VULC ⁵ Quis posuit mensuras ejus, si nosti ?
vel quis tetendit super eam lineam ?

VULC ⁶ Super quo bases illius solidatæ sunt ?
aut quis demisit lapidem angularem ejus,

VULC ⁷ cum me laudarent simul astra matutina,
et jubilarent omnes filii Dei ?

VULC ⁸ Quis conclusit ostiis mare,
quando erumpebat quasi de vulva procedens ;

VULC ⁹ cum ponerem nubem vestimentum ejus,
et caligine illud quasi pannis infantiæ obvolverem ?

VULC ¹⁰ Circumdedi illud terminis meis,
et posui vectem et ostia,

VULC ¹¹ et dixi : Usque huc venies, et non procedes amplius,
et hic confringes tumentes fluctus tuos.

VULC ¹² Numquid post ortum tuum præcepisti diluculo,
et ostendisti auroræ locum suum ?

VULC ¹³ Et tenuisti concutiens extrema terræ,
et excussisti impios ex ea ?

VULC ¹⁴ Restituetur ut lutum signaculum,
et stabit sicut vestimentum :

VULC ¹⁵ auferetur ab impiis lux sua,
et brachium excelsum confringetur.

VULC ¹⁶ Numquid ingressus es profunda maris,
et in novissimis abyssi deambulasti ?

VULC ¹⁷ Numquid apertæ sunt tibi portæ mortis,
et ostia tenebrosa vidisti ?

VULC ¹⁸ Numquid considerasti latitudinem terræ ?
indica mihi, si nosti, omnia :

VULC ¹⁹ in qua via lux habitet,
et tenebrarum quis locus sit :

VULC ²⁰ ut ducas unumquodque ad terminos suos,
et intelligas semitas domus ejus.

VULC ²¹ Sciebas tunc quod nasciturus esses,
et numerum dierum tuorum noveras ?

VULC ²² Numquid ingressus es thesauros nivis,
aut thesauros grandinis aspexisti,

VULC ²³ quæ præparavi in tempus hostis,
in diem pugnæ et belli ?

VULC ²⁴ Per quam viam spargitur lux,
dividitur æstus super terram ?

VULC ²⁵ Quis dedit vehementissimo imbri cursum,
et viam sonantis tonitrui,

VULC ²⁶ ut plueret super terram absque homine in deserto,
ubi nullus mortalium commoratur ;

VULC ²⁷ ut impleret inviam et desolatam,
et produceret herbas virentes ?

VULC ²⁸ Quis est pluviæ pater ?
vel quis genuit stillas roris ?

VULC ²⁹ De cujus utero egressa est glacies ?
et gelu de cælo quis genuit ?

VULC ³⁰ In similitudinem lapidis aquæ durantur,
et superficies abyssi constringitur.

VULC ³¹ Numquid conjungere valebis micantes stellas Pleiadas,
aut gyrum Arcturi poteris dissipare ?

VULC ³² Numquid producis luciferum in tempore suo,
et vesperum super filios terræ consurgere facis ?

VULC ³³ Numquid nosti ordinem cæli,
et pones rationem ejus in terra ?

VULC ³⁴ Numquid elevabis in nebula vocem tuam,
et impetus aquarum operiet te ?

VULC ³⁵ Numquid mittes fulgura, et ibunt,
et revertentia dicent tibi : Adsumus ?

VULC ³⁶ Quis posuit in visceribus hominis sapientiam ?
vel quis dedit gallo intelligentiam ?

VULC ³⁷ Quis enarrabit cælorum rationem ?
et concentum cæli quis dormire faciet ?

VULC ³⁸ Quando fundebatur pulvis in terra,
et glebæ compingebantur ?

VULC ³⁹ Numquid capies leænæ prædam,
et animam catulorum ejus implebis,

VULC ⁴⁰ quando cubant in antris,
et in specubus insidiantur ?

VULC ⁴¹ Quis præparat corvo escam suam,
quando pulli ejus clamant ad Deum,
vagantes, eo quod non habeant cibos ?]