VULC ¹ Respondens autem Dominus Job de turbine, dixit :

VULC ² [Accinge sicut vir lumbos tuos :
interrogabo te, et indica mihi.

VULC ³ Numquid irritum facies judicium meum,
et condemnabis me, ut tu justificeris ?

VULC ⁴ Et si habes brachium sicut Deus ?
et si voce simili tonas ?

VULC ⁵ Circumda tibi decorem, et in sublime erigere,
et esto gloriosus, et speciosis induere vestibus.

VULC ⁶ Disperge superbos in furore tuo,
et respiciens omnem arrogantem humilia.

VULC ⁷ Respice cunctos superbos, et confunde eos,
et contere impios in loco suo.

VULC ⁸ Absconde eos in pulvere simul,
et facies eorum demerge in foveam.

VULC ⁹ Et ego confitebor
quod salvare te possit dextera tua.

VULC ¹⁰ Ecce behemoth quem feci tecum,
fœnum quasi bos comedet.

VULC ¹¹ Fortitudo ejus in lumbis ejus,
et virtus illius in umbilico ventris ejus.

VULC ¹² Stringit caudam suam quasi cedrum ;
nervi testiculorum ejus perplexi sunt.

VULC ¹³ Ossa ejus velut fistulæ æris ;
cartilago illius quasi laminæ ferreæ.

VULC ¹⁴ Ipse est principium viarum Dei :
qui fecit eum applicabit gladium ejus.

VULC ¹⁵ Huic montes herbas ferunt :
omnes bestiæ agri ludent ibi.

VULC ¹⁶ Sub umbra dormit in secreto calami,
et in locis humentibus.

VULC ¹⁷ Protegunt umbræ umbram ejus :
circumdabunt eum salices torrentis.

VULC ¹⁸ Ecce absorbebit fluvium, et non mirabitur,
et habet fiduciam quod influat Jordanis in os ejus.

VULC ¹⁹ In oculis ejus quasi hamo capiet eum,
et in sudibus perforabit nares ejus.

VULC ²⁰ An extrahere poteris Leviathan hamo,
et fune ligabis linguam ejus ?

VULC ²¹ Numquid pones circulum in naribus ejus,
aut armilla perforabis maxillam ejus ?

VULC ²² Numquid multiplicabit ad te preces,
aut loquetur tibi mollia ?

VULC ²³ Numquid feriet tecum pactum,
et accipies eum servum sempiternum ?

VULC ²⁴ Numquid illudes ei quasi avi,
aut ligabis eum ancillis tuis ?

VULC ²⁵ Concident eum amici ?
divident illum negotiatores ?

VULC ²⁶ Numquid implebis sagenas pelle ejus,
et gurgustium piscium capite illius ?

VULC ²⁷ Pone super eum manum tuam :
memento belli, nec ultra addas loqui.

VULC ²⁸ Ecce spes ejus frustrabitur eum,
et videntibus cunctis præcipitabitur.]