VULC ¹ [Qui diligit disciplinam diligit scientiam ;
qui autem odit increpationes insipiens est.

VULC ² Qui bonus est hauriet gratiam a Domino ;
qui autem confidit in cogitationibus suis impie agit.

VULC ³ Non roborabitur homo ex impietate,
et radix justorum non commovebitur.

VULC ⁴ Mulier diligens corona est viro suo ;
et putredo in ossibus ejus, quæ confusione res dignas gerit.

VULC ⁵ Cogitationes justorum judicia,
et consilia impiorum fraudulenta.

VULC ⁶ Verba impiorum insidiantur sanguini ;
os justorum liberabit eos.

VULC ⁷ Verte impios, et non erunt ;
domus autem justorum permanebit.

VULC ⁸ Doctrina sua noscetur vir ;
qui autem vanus et excors est patebit contemptui.

VULC ⁹ Melior est pauper et sufficiens sibi
quam gloriosus et indigens pane.

VULC ¹⁰ Novit justus jumentorum suorum animas ;
viscera autem impiorum crudelia.

VULC ¹¹ Qui operatur terram suam satiabitur panibus ;
qui autem sectatur otium stultissimus est.
Qui suavis est in vini demorationibus,
in suis munitionibus relinquit contumeliam.

VULC ¹² Desiderium impii munimentum est pessimorum ;
radix autem justorum proficiet.]

VULC ¹³ [Propter peccata labiorum ruina proximat malo ;
effugiet autem justus de angustia.

VULC ¹⁴ De fructu oris sui unusquisque replebitur bonis,
et juxta opera manuum suarum retribuetur ei.

VULC ¹⁵ Via stulti recta in oculis ejus ;
qui autem sapiens est audit consilia.

VULC ¹⁶ Fatuus statim indicat iram suam ;
qui autem dissimulat injuriam callidus est.

VULC ¹⁷ Qui quod novit loquitur, index justitiæ est ;
qui autem mentitur, testis est fraudulentus.

VULC ¹⁸ Est qui promittit, et quasi gladio pungitur conscientiæ :
lingua autem sapientium sanitas est.

VULC ¹⁹ Labium veritatis firmum erit in perpetuum ;
qui autem testis est repentinus, concinnat linguam mendacii.

VULC ²⁰ Dolus in corde cogitantium mala ;
qui autem pacis ineunt consilia, sequitur eos gaudium.

VULC ²¹ Non contristabit justum quidquid ei acciderit :
impii autem replebuntur malo.

VULC ²² Abominatio est Domino labia mendacia ;
qui autem fideliter agunt placent ei.

VULC ²³ Homo versatus celat scientiam,
et cor insipientium provocat stultitiam.]

VULC ²⁴ [Manus fortium dominabitur ;
quæ autem remissa est, tributis serviet.

VULC ²⁵ Mœror in corde viri humiliabit illum,
et sermone bono lætificabitur.

VULC ²⁶ Qui negligit damnum propter amicum, justus est ;
iter autem impiorum decipiet eos.

VULC ²⁷ Non inveniet fraudulentus lucrum,
et substantia hominis erit auri pretium.

VULC ²⁸ In semita justitiæ vita ;
iter autem devium ducit ad mortem.]