VULC ¹ [Sapiens mulier ædificat domum suam ;
insipiens exstructam quoque manibus destruet.

VULC ² Ambulans recto itinere, et timens Deum,
despicitur ab eo qui infami graditur via.

VULC ³ In ore stulti virga superbiæ ;
labia autem sapientium custodiunt eos.

VULC ⁴ Ubi non sunt boves, præsepe vacuum est ;
ubi autem plurimæ segetes, ibi manifesta est fortitudo bovis.

VULC ⁵ Testis fidelis non mentitur ;
profert autem mendacium dolosus testis.

VULC ⁶ Quærit derisor sapientiam, et non invenit ;
doctrina prudentium facilis.

VULC ⁷ Vade contra virum stultum,
et nescit labia prudentiæ.

VULC ⁸ Sapientia callidi est intelligere viam suam,
et imprudentia stultorum errans.

VULC ⁹ Stultus illudet peccatum,
et inter justos morabitur gratia.

VULC ¹⁰ Cor quod novit amaritudinem animæ suæ,
in gaudio ejus non miscebitur extraneus.

VULC ¹¹ Domus impiorum delebitur :
tabernacula vero justorum germinabunt.

VULC ¹² Est via quæ videtur homini justa,
novissima autem ejus deducunt ad mortem.

VULC ¹³ Risus dolore miscebitur,
et extrema gaudii luctus occupat.

VULC ¹⁴ Viis suis replebitur stultus,
et super eum erit vir bonus.]

VULC ¹⁵ [Innocens credit omni verbo ;
astutus considerat gressus suos.
Filio doloso nihil erit boni ;
servo autem sapienti prosperi erunt actus,
et dirigetur via ejus.

VULC ¹⁶ Sapiens timet, et declinat a malo ;
stultus transilit, et confidit.

VULC ¹⁷ Impatiens operabitur stultitiam,
et vir versutus odiosus est.

VULC ¹⁸ Possidebunt parvuli stultitiam,
et exspectabunt astuti scientiam.

VULC ¹⁹ Jacebunt mali ante bonos,
et impii ante portas justorum.

VULC ²⁰ Etiam proximo suo pauper odiosus erit :
amici vero divitum multi.

VULC ²¹ Qui despicit proximum suum peccat ;
qui autem miseretur pauperis beatus erit.
Qui credit in Domino misericordiam diligit.

VULC ²² Errant qui operantur malum ;
misericordia et veritas præparant bona.

VULC ²³ In omni opere erit abundantia ;
ubi autem verba sunt plurima, ibi frequenter egestas.

VULC ²⁴ Corona sapientium divitiæ eorum ;
fatuitas stultorum imprudentia.

VULC ²⁵ Liberat animas testis fidelis,
et profert mendacia versipellis.]

VULC ²⁶ [In timore Domini fiducia fortitudinis,
et filiis ejus erit spes.

VULC ²⁷ Timor Domini fons vitæ,
ut declinent a ruina mortis.

VULC ²⁸ In multitudine populi dignitas regis,
et in paucitate plebis ignominia principis.

VULC ²⁹ Qui patiens est multa gubernatur prudentia ;
qui autem impatiens est exaltat stultitiam suam.

VULC ³⁰ Vita carnium sanitas cordis ;
putredo ossium invidia.

VULC ³¹ Qui calumniatur egentem exprobrat factori ejus ;
honorat autem eum qui miseretur pauperis.

VULC ³² In malitia sua expelletur impius :
sperat autem justus in morte sua.

VULC ³³ In corde prudentis requiescit sapientia,
et indoctos quosque erudiet.

VULC ³⁴ Justitia elevat gentem ;
miseros autem facit populos peccatum.

VULC ³⁵ Acceptus est regi minister intelligens ;
iracundiam ejus inutilis sustinebit.]