VULC ¹ [Melius est nomen bonum quam divitiæ multæ ;
super argentum et aurum gratia bona.

VULC ² Dives et pauper obviaverunt sibi :
utriusque operator est Dominus.

VULC ³ Callidus vidit malum, et abscondit se ;
innocens pertransiit, et afflictus est damno.

VULC ⁴ Finis modestiæ timor Domini,
divitiæ, et gloria, et vita.

VULC ⁵ Arma et gladii in via perversi ;
custos autem animæ suæ longe recedit ab eis.

VULC ⁶ Proverbium est : adolescens juxta viam suam ;
etiam cum senuerit, non recedet ab ea.

VULC ⁷ Dives pauperibus imperat,
et qui accipit mutuum servus est fœnerantis.

VULC ⁸ Qui seminat iniquitatem metet mala,
et virga iræ suæ consummabitur.

VULC ⁹ Qui pronus est ad misericordiam benedicetur :
de panibus enim suis dedit pauperi.
Victoriam et honorem acquiret qui dat munera ;
animam autem aufert accipientium.

VULC ¹⁰ Ejice derisorem, et exibit cum eo jurgium,
cessabuntque causæ et contumeliæ.

VULC ¹¹ Qui diligit cordis munditiam,
propter gratiam labiorum suorum habebit amicum regem.

VULC ¹² Oculi Domini custodiunt scientiam,
et supplantantur verba iniqui.

VULC ¹³ Dicit piger : Leo est foris ;
in medio platearum occidendus sum.

VULC ¹⁴ Fovea profunda os alienæ :
cui iratus est Dominus, incidet in eam.

VULC ¹⁵ Stultitia colligata est in corde pueri,
et virga disciplinæ fugabit eam.

VULC ¹⁶ Qui calumniatur pauperem ut augeat divitias suas,
dabit ipse ditiori, et egebit.]

VULC ¹⁷ [Inclina aurem tuam, et audi verba sapientium :
appone autem cor ad doctrinam meam,

VULC ¹⁸ quæ pulchra erit tibi cum servaveris eam in ventre tuo,
et redundabit in labiis tuis :

VULC ¹⁹ ut sit in Domino fiducia tua,
unde et ostendi eam tibi hodie.

VULC ²⁰ Ecce descripsi eam tibi tripliciter,
in cogitationibus et scientia :

VULC ²¹ ut ostenderem tibi firmitatem et eloquia veritatis,
respondere ex his illis qui miserunt te.

VULC ²² Non facias violentiam pauperi quia pauper est,
neque conteras egenum in porta :

VULC ²³ quia judicabit Dominus causam ejus,
et configet eos qui confixerunt animam ejus.

VULC ²⁴ Noli esse amicus homini iracundo,
neque ambules cum viro furioso :

VULC ²⁵ ne forte discas semitas ejus,
et sumas scandalum animæ tuæ.

VULC ²⁶ Noli esse cum his qui defigunt manus suas,
et qui vades se offerunt pro debitis :

VULC ²⁷ si enim non habes unde restituas,
quid causæ est ut tollat operimentum de cubili tuo ?

VULC ²⁸ Ne transgrediaris terminos antiquos,
quos posuerunt patres tui.

VULC ²⁹ Vidisti virum velocem in opere suo ?
coram regibus stabit, nec erit ante ignobiles.]