VULC ¹ [Ne æmuleris viros malos,
nec desideres esse cum eis :

VULC ² quia rapinas meditatur mens eorum,
et fraudes labia eorum loquuntur.

VULC ³ Sapientia ædificabitur domus,
et prudentia roborabitur.

VULC ⁴ In doctrina replebuntur cellaria,
universa substantia pretiosa et pulcherrima.

VULC ⁵ Vir sapiens fortis est,
et vir doctus robustus et validus :

VULC ⁶ quia cum dispositione initur bellum,
et erit salus ubi multa consilia sunt.

VULC ⁷ Excelsa stulto sapientia ;
in porta non aperiet os suum.

VULC ⁸ Qui cogitat mala facere stultus vocabitur :

VULC ⁹ cogitatio stulti peccatum est,
et abominatio hominum detractor.

VULC ¹⁰ Si desperaveris lassus in die angustiæ,
imminuetur fortitudo tua.]

VULC ¹¹ [Erue eos qui ducuntur ad mortem,
et qui trahuntur ad interitum, liberare ne cesses.

VULC ¹² Si dixeris : Vires non suppetunt ;
qui inspector est cordis ipse intelligit :
et servatorem animæ tuæ nihil fallit,
reddetque homini juxta opera sua.

VULC ¹³ Comede, fili mi, mel, quia bonum est,
et favum dulcissimum gutturi tuo.

VULC ¹⁴ Sic et doctrina sapientiæ animæ tuæ :
quam cum inveneris, habebis in novissimis spem,
et spes tua non peribit.

VULC ¹⁵ Ne insidieris, et quæras impietatem in domo justi,
neque vastes requiem ejus.

VULC ¹⁶ Septies enim cadet justus, et resurget :
impii autem corruent in malum.

VULC ¹⁷ Cum ceciderit inimicus tuus ne gaudeas,
et in ruina ejus ne exsultet cor tuum :

VULC ¹⁸ ne forte videat Dominus, et displiceat ei,
et auferat ab eo iram suam.

VULC ¹⁹ Ne contendas cum pessimis,
nec æmuleris impios :

VULC ²⁰ quoniam non habent futurorum spem mali,
et lucerna impiorum extinguetur.

VULC ²¹ Time Dominum, fili mi, et regem,
et cum detractoribus non commiscearis :

VULC ²² quoniam repente consurget perditio eorum,
et ruinam utriusque quis novit ?]

VULC ²³ Hæc quoque sapientibus. [Cognoscere personam in judicio non est bonum.

VULC ²⁴ Qui dicunt impio : Justus es : maledicent eis populi,
et detestabuntur eos tribus.

VULC ²⁵ Qui arguunt eum laudabuntur,
et super ipsos veniet benedictio.

VULC ²⁶ Labia deosculabitur
qui recta verba respondet.

VULC ²⁷ Præpara foris opus tuum,
et diligenter exerce agrum tuum,
ut postea ædifices domum tuam.

VULC ²⁸ Ne sis testis frustra contra proximum tuum,
nec lactes quemquam labiis tuis.

VULC ²⁹ Ne dicas : Quomodo fecit mihi, sic faciam ei ;
reddam unicuique secundum opus suum.]

VULC ³⁰ [Per agrum hominis pigri transivi,
et per vineam viri stulti :

VULC ³¹ et ecce totum repleverant urticæ,
et operuerant superficiem ejus spinæ,
et maceria lapidum destructa erat.

VULC ³² Quod cum vidissem, posui in corde meo,
et exemplo didici disciplinam.

VULC ³³ Parum, inquam, dormies, modicum dormitabis ;
pauxillum manus conseres ut quiescas :

VULC ³⁴ et veniet tibi quasi cursor egestas,
et mendicitas quasi vir armatus.]