VULC ¹ [Fili mi, attende ad sapientiam meam,
et prudentiæ meæ inclina aurem tuam :

VULC ² ut custodias cogitationes, et disciplinam labia tua conservent.
Ne attendas fallaciæ mulieris ;

VULC ³ favus enim distillans labia meretricis,
et nitidius oleo guttur ejus :

VULC ⁴ novissima autem illius amara quasi absinthium,
et acuta quasi gladius biceps.

VULC ⁵ Pedes ejus descendunt in mortem,
et ad inferos gressus illius penetrant.

VULC ⁶ Per semitam vitæ non ambulant ;
vagi sunt gressus ejus et investigabiles.

VULC ⁷ Nunc ergo fili mi, audi me,
et ne recedas a verbis oris mei.

VULC ⁸ Longe fac ab ea viam tuam,
et ne appropinques foribus domus ejus.

VULC ⁹ Ne des alienis honorem tuum,
et annos tuos crudeli :

VULC ¹⁰ ne forte impleantur extranei viribus tuis,
et labores tui sint in domo aliena,

VULC ¹¹ et gemas in novissimis,
quando consumpseris carnes tuas et corpus tuum,
et dicas :

VULC ¹² Cur detestatus sum disciplinam,
et increpationibus non acquievit cor meum,

VULC ¹³ nec audivi vocem docentium me,
et magistris non inclinavi aurem meam ?

VULC ¹⁴ pene fui in omni malo,
in medio ecclesiæ et synagogæ.

VULC ¹⁵ Bibe aquam de cisterna tua,
et fluenta putei tui ;

VULC ¹⁶ deriventur fontes tui foras,
et in plateis aquas tuas divide.

VULC ¹⁷ Habeto eas solus,
nec sint alieni participes tui.

VULC ¹⁸ Sit vena tua benedicta,
et lætare cum muliere adolescentiæ tuæ.

VULC ¹⁹ Cerva carissima, et gratissimus hinnulus :
ubera ejus inebrient te in omni tempore ;
in amore ejus delectare jugiter.

VULC ²⁰ Quare seduceris, fili mi, ab aliena,
et foveris in sinu alterius ?

VULC ²¹ Respicit Dominus vias hominis,
et omnes gressus ejus considerat.

VULC ²² Iniquitates suas capiunt impium,
et funibus peccatorum suorum constringitur.

VULC ²³ Ipse morietur, quia non habuit disciplinam,
et in multitudine stultitiæ suæ decipietur.]