VULC ¹ [Numquid non sapientia clamitat,
et prudentia dat vocem suam ?

VULC ² In summis excelsisque verticibus supra viam,
in mediis semitis stans,

VULC ³ juxta portas civitatis,
in ipsis foribus loquitur, dicens :

VULC ⁴ O viri, ad vos clamito,
et vox mea ad filios hominum.

VULC ⁵ Intelligite, parvuli, astutiam,
et insipientes, animadvertite.

VULC ⁶ Audite, quoniam de rebus magnis locutura sum,
et aperientur labia mea ut recta prædicent.

VULC ⁷ Veritatem meditabitur guttur meum,
et labia mea detestabuntur impium.

VULC ⁸ Justi sunt omnes sermones mei :
non est in eis pravum quid, neque perversum ;

VULC ⁹ recti sunt intelligentibus,
et æqui invenientibus scientiam.

VULC ¹⁰ Accipite disciplinam meam, et non pecuniam ;
doctrinam magis quam aurum eligite :

VULC ¹¹ melior est enim sapientia cunctis pretiosissimis,
et omne desiderabile ei non potest comparari.]

VULC ¹² [Ego sapientia, habito in consilio,
et eruditis intersum cogitationibus.

VULC ¹³ Timor Domini odit malum :
arrogantiam, et superbiam,
et viam pravam, et os bilingue, detestor.

VULC ¹⁴ Meum est consilium et æquitas ;
mea est prudentia, mea est fortitudo.

VULC ¹⁵ Per me reges regnant,
et legum conditores justa decernunt ;

VULC ¹⁶ per me principes imperant,
et potentes decernunt justitiam.

VULC ¹⁷ Ego diligentes me diligo,
et qui mane vigilant ad me, invenient me.

VULC ¹⁸ Mecum sunt divitiæ et gloria,
opes superbæ et justitia.

VULC ¹⁹ Melior est enim fructus meus auro et lapide pretioso,
et genimina mea argento electo.

VULC ²⁰ In viis justitiæ ambulo,
in medio semitarum judicii :

VULC ²¹ ut ditem diligentes me,
et thesauros eorum repleam.]

VULC ²² [Dominus possedit me in initio viarum suarum
antequam quidquam faceret a principio.

VULC ²³ Ab æterno ordinata sum,
et ex antiquis antequam terra fieret.

VULC ²⁴ Nondum erant abyssi, et ego jam concepta eram :
necdum fontes aquarum eruperant,

VULC ²⁵ necdum montes gravi mole constiterant :
ante colles ego parturiebar.

VULC ²⁶ Adhuc terram non fecerat, et flumina,
et cardines orbis terræ.

VULC ²⁷ Quando præparabat cælos, aderam ;
quando certa lege et gyro vallabat abyssos ;

VULC ²⁸ quando æthera firmabat sursum,
et librabat fontes aquarum ;

VULC ²⁹ quando circumdabat mari terminum suum,
et legem ponebat aquis, ne transirent fines suos ;
quando appendebat fundamenta terræ :

VULC ³⁰ cum eo eram, cuncta componens.
Et delectabar per singulos dies,
ludens coram eo omni tempore,

VULC ³¹ ludens in orbe terrarum ;
et deliciæ meæ esse cum filiis hominum.

VULC ³² Nunc ergo, filii, audite me :
beati qui custodiunt vias meas.

VULC ³³ Audite disciplinam, et estote sapientes,
et nolite abjicere eam.

VULC ³⁴ Beatus homo qui audit me,
et qui vigilat ad fores meas quotidie,
et observat ad postes ostii mei.

VULC ³⁵ Qui me invenerit, inveniet vitam,
et hauriet salutem a Domino.

VULC ³⁶ Qui autem in me peccaverit, lædet animam suam ;
omnes qui me oderunt diligunt mortem.]