VULC ¹ Psalmus David. [Domine, clamavi ad te : exaudi me ;
intende voci meæ, cum clamavero ad te.

VULC ² Dirigatur oratio mea sicut incensum in conspectu tuo ;
elevatio manuum mearum sacrificium vespertinum.

VULC ³ Pone, Domine, custodiam ori meo,
et ostium circumstantiæ labiis meis.

VULC ⁴ Non declines cor meum in verba malitiæ,
ad excusandas excusationes in peccatis ;
cum hominibus operantibus iniquitatem,
et non communicabo cum electis eorum.

VULC ⁵ Corripiet me justus in misericordia, et increpabit me :
oleum autem peccatoris non impinguet caput meum.
Quoniam adhuc et oratio mea in beneplacitis eorum :

VULC ⁶ absorpti sunt juncti petræ judices eorum.
Audient verba mea, quoniam potuerunt.

VULC ⁷ Sicut crassitudo terræ erupta est super terram,
dissipata sunt ossa nostra secus infernum.

VULC ⁸ Quia ad te, Domine, Domine, oculi mei ;
in te speravi, non auferas animam meam.

VULC ⁹ Custodi me a laqueo quem statuerunt mihi,
et a scandalis operantium iniquitatem.

VULC ¹⁰ Cadent in retiaculo ejus peccatores :
singulariter sum ego, donec transeam.]