VULC ¹ Psalmus David. Adversus Goliath. [Benedictus Dominus Deus meus,
qui docet manus meas ad prælium,
et digitos meos ad bellum.

VULC ² Misericordia mea et refugium meum ;
susceptor meus et liberator meus ;
protector meus, et in ipso speravi,
qui subdit populum meum sub me.

VULC ³ Domine, quid est homo, quia innotuisti ei ?
aut filius hominis, quia reputas eum ?

VULC ⁴ Homo vanitati similis factus est ;
dies ejus sicut umbra prætereunt.

VULC ⁵ Domine, inclina cælos tuos, et descende ;
tange montes, et fumigabunt.

VULC ⁶ Fulgura coruscationem, et dissipabis eos ;
emitte sagittas tuas, et conturbabis eos.

VULC ⁷ Emitte manum tuam de alto : eripe me,
et libera me de aquis multis,
de manu filiorum alienorum :

VULC ⁸ quorum os locutum est vanitatem,
et dextera eorum dextera iniquitatis.

VULC ⁹ Deus, canticum novum cantabo tibi ;
in psalterio decachordo psallam tibi.

VULC ¹⁰ Qui das salutem regibus,
qui redemisti David servum tuum de gladio maligno,

VULC ¹¹ eripe me, et erue me de manu filiorum alienorum,
quorum os locutum est vanitatem,
et dextera eorum dextera iniquitatis.

VULC ¹² Quorum filii sicut novellæ plantationes in juventute sua ;
filiæ eorum compositæ,
circumornatæ ut similitudo templi.

VULC ¹³ Promptuaria eorum plena, eructantia ex hoc in illud ;
oves eorum fœtosæ, abundantes in egressibus suis ;

VULC ¹⁴ boves eorum crassæ.
Non est ruina maceriæ, neque transitus,
neque clamor in plateis eorum.

VULC ¹⁵ Beatum dixerunt populum cui hæc sunt ;
beatus populus cujus Dominus Deus ejus.]