VULC ¹ Alleluja. [Laudate Dominum de cælis ;
laudate eum in excelsis.

VULC ² Laudate eum, omnes angeli ejus ;
laudate eum, omnes virtutes ejus.

VULC ³ Laudate eum, sol et luna ;
laudate eum, omnes stellæ et lumen.

VULC ⁴ Laudate eum, cæli cælorum ;
et aquæ omnes quæ super cælos sunt,

VULC ⁵ laudent nomen Domini.
Quia ipse dixit, et facta sunt ;
ipse mandavit, et creata sunt.

VULC ⁶ Statuit ea in æternum, et in sæculum sæculi ;
præceptum posuit, et non præteribit.

VULC ⁷ Laudate Dominum de terra,
dracones et omnes abyssi ;

VULC ⁸ ignis, grando, nix, glacies, spiritus procellarum,
quæ faciunt verbum ejus ;

VULC ⁹ montes, et omnes colles ;
ligna fructifera, et omnes cedri ;

VULC ¹⁰ bestiæ, et universa pecora ;
serpentes, et volucres pennatæ ;

VULC ¹¹ reges terræ et omnes populi ;
principes et omnes judices terræ ;

VULC ¹² juvenes et virgines ; senes cum junioribus,
laudent nomen Domini :

VULC ¹³ quia exaltatum est nomen ejus solius.

VULC ¹⁴ Confessio ejus super cælum et terram ;
et exaltavit cornu populi sui.
Hymnus omnibus sanctis ejus ;
filiis Israël, populo appropinquanti sibi.
Alleluja.]