VULC ¹ In finem. Psalmus David.

VULC ² [Cæli enarrant gloriam Dei,
et opera manuum ejus annuntiat firmamentum.

VULC ³ Dies diei eructat verbum,
et nox nocti indicat scientiam.

VULC ⁴ Non sunt loquelæ, neque sermones,
quorum non audiantur voces eorum.

VULC ⁵ In omnem terram exivit sonus eorum,
et in fines orbis terræ verba eorum.

VULC ⁶ In sole posuit tabernaculum suum ;
et ipse tamquam sponsus procedens de thalamo suo.
Exsultavit ut gigas ad currendam viam ;

VULC ⁷ a summo cælo egressio ejus.
Et occursus ejus usque ad summum ejus ;
nec est qui se abscondat a calore ejus.

VULC ⁸ Lex Domini immaculata, convertens animas ;
testimonium Domini fidele, sapientiam præstans parvulis.

VULC ⁹ Justitiæ Domini rectæ, lætificantes corda ;
præceptum Domini lucidum, illuminans oculos.

VULC ¹⁰ Timor Domini sanctus, permanens in sæculum sæculi ;
judicia Domini vera, justificata in semetipsa,

VULC ¹¹ desiderabilia super aurum et lapidem pretiosum multum,
et dulciora super mel et favum.

VULC ¹² Etenim servus tuus custodit ea ;
in custodiendis illis retributio multa.

VULC ¹³ Delicta quis intelligit ?
ab occultis meis munda me ;

VULC ¹⁴ et ab alienis parce servo tuo.
Si mei non fuerint dominati, tunc immaculatus ero,
et emundabor a delicto maximo.

VULC ¹⁵ Et erunt ut complaceant eloquia oris mei,
et meditatio cordis mei in conspectu tuo semper.
Domine, adjutor meus, et redemptor meus.]