VULC ¹ In finem. Psalmus David.

VULC ² [Domine, in virtute tua lætabitur rex,
et super salutare tuum exsultabit vehementer.

VULC ³ Desiderium cordis ejus tribuisti ei,
et voluntate labiorum ejus non fraudasti eum.

VULC ⁴ Quoniam prævenisti eum in benedictionibus dulcedinis ;
posuisti in capite ejus coronam de lapide pretioso.

VULC ⁵ Vitam petiit a te, et tribuisti ei longitudinem dierum,
in sæculum, et in sæculum sæculi.

VULC ⁶ Magna est gloria ejus in salutari tuo ;
gloriam et magnum decorem impones super eum.

VULC ⁷ Quoniam dabis eum in benedictionem in sæculum sæculi ;
lætificabis eum in gaudio cum vultu tuo.

VULC ⁸ Quoniam rex sperat in Domino,
et in misericordia Altissimi non commovebitur.

VULC ⁹ Inveniatur manus tua omnibus inimicis tuis ;
dextera tua inveniat omnes qui te oderunt.

VULC ¹⁰ Pones eos ut clibanum ignis in tempore vultus tui :
Dominus in ira sua conturbabit eos,
et devorabit eos ignis.

VULC ¹¹ Fructum eorum de terra perdes,
et semen eorum a filiis hominum,

VULC ¹² quoniam declinaverunt in te mala ;
cogitaverunt consilia quæ non potuerunt stabilire.

VULC ¹³ Quoniam pones eos dorsum ;
in reliquiis tuis præparabis vultum eorum.

VULC ¹⁴ Exaltare, Domine, in virtute tua ;
cantabimus et psallemus virtutes tuas.]