VULC ¹ Ipsi David. [Judica, Domine, nocentes me ;
expugna impugnantes me.

VULC ² Apprehende arma et scutum,
et exsurge in adjutorium mihi.

VULC ³ Effunde frameam, et conclude adversus eos qui persequuntur me ;
dic animæ meæ : Salus tua ego sum.

VULC ⁴ Confundantur et revereantur quærentes animam meam ;
avertantur retrorsum et confundantur cogitantes mihi mala.

VULC ⁵ Fiant tamquam pulvis ante faciem venti,
et angelus Domini coarctans eos.

VULC ⁶ Fiat via illorum tenebræ et lubricum,
et angelus Domini persequens eos.

VULC ⁷ Quoniam gratis absconderunt mihi interitum laquei sui ; supervacue exprobraverunt animam meam.

VULC ⁸ Veniat illi laqueus quem ignorat,
et captio quam abscondit apprehendat eum,
et in laqueum cadat in ipsum.

VULC ⁹ Anima autem mea exsultabit in Domino,
et delectabitur super salutari suo.

VULC ¹⁰ Omnia ossa mea dicent :
Domine, quis similis tibi ?
eripiens inopem de manu fortiorum ejus ;
egenum et pauperem a diripientibus eum.

VULC ¹¹ Surgentes testes iniqui,
quæ ignorabam interrogabant me.

VULC ¹² Retribuebant mihi mala pro bonis,
sterilitatem animæ meæ.

VULC ¹³ Ego autem, cum mihi molesti essent, induebar cilicio ;
humiliabam in jejunio animam meam,
et oratio mea in sinu meo convertetur.

VULC ¹⁴ Quasi proximum et quasi fratrem nostrum sic complacebam ;
quasi lugens et contristatus sic humiliabar.

VULC ¹⁵ Et adversum me lætati sunt, et convenerunt ;
congregata sunt super me flagella, et ignoravi.

VULC ¹⁶ Dissipati sunt, nec compuncti ;
tentaverunt me, subsannaverunt me subsannatione ;
frenduerunt super me dentibus suis.

VULC ¹⁷ Domine, quando respicies ?
Restitue animam meam a malignitate eorum ;
a leonibus unicam meam.

VULC ¹⁸ Confitebor tibi in ecclesia magna ; in populo gravi laudabo te.

VULC ¹⁹ Non supergaudeant mihi qui adversantur mihi inique,
qui oderunt me gratis, et annuunt oculis.

VULC ²⁰ Quoniam mihi quidem pacifice loquebantur ;
et in iracundia terræ loquentes, dolos cogitabant.

VULC ²¹ Et dilataverunt super me os suum ;
dixerunt : Euge, euge ! viderunt oculi nostri.

VULC ²² Vidisti, Domine : ne sileas ;
Domine, ne discedas a me.

VULC ²³ Exsurge et intende judicio meo, Deus meus ;
et Dominus meus, in causam meam.

VULC ²⁴ Judica me secundum justitiam tuam, Domine Deus meus,
et non supergaudeant mihi.

VULC ²⁵ Non dicant in cordibus suis : Euge, euge, animæ nostræ ;
nec dicant : Devoravimus eum.

VULC ²⁶ Erubescant et revereantur simul qui gratulantur malis meis ;
induantur confusione et reverentia qui magna loquuntur super me.

VULC ²⁷ Exsultent et lætentur qui volunt justitiam meam ;
et dicant semper : Magnificetur Dominus, qui volunt pacem servi ejus.

VULC ²⁸ Et lingua mea meditabitur justitiam tuam ;
tota die laudem tuam.]