VULC ¹ Psalmus Asaph. [Deus deorum Dominus locutus est,
et vocavit terram a solis ortu usque ad occasum.

VULC ² Ex Sion species decoris ejus :

VULC ³ Deus manifeste veniet ;
Deus noster, et non silebit.
Ignis in conspectu ejus exardescet ;
et in circuitu ejus tempestas valida.

VULC ⁴ Advocabit cælum desursum, et terram,
discernere populum suum.

VULC ⁵ Congregate illi sanctos ejus,
qui ordinant testamentum ejus super sacrificia.

VULC ⁶ Et annuntiabunt cæli justitiam ejus,
quoniam Deus judex est.

VULC ⁷ Audi, populus meus, et loquar ;
Israël, et testificabor tibi :
Deus, Deus tuus ego sum.

VULC ⁸ Non in sacrificiis tuis arguam te ;
holocausta autem tua in conspectu meo sunt semper.

VULC ⁹ Non accipiam de domo tua vitulos,
neque de gregibus tuis hircos :

VULC ¹⁰ quoniam meæ sunt omnes feræ silvarum,
jumenta in montibus, et boves.

VULC ¹¹ Cognovi omnia volatilia cæli,
et pulchritudo agri mecum est.

VULC ¹² Si esuriero, non dicam tibi :
meus est enim orbis terræ et plenitudo ejus.

VULC ¹³ Numquid manducabo carnes taurorum ?
aut sanguinem hircorum potabo ?

VULC ¹⁴ Immola Deo sacrificium laudis,
et redde Altissimo vota tua.

VULC ¹⁵ Et invoca me in die tribulationis :
eruam te, et honorificabis me.

VULC ¹⁶ Peccatori autem dixit Deus : Quare tu enarras justitias meas ?
et assumis testamentum meum per os tuum ?

VULC ¹⁷ Tu vero odisti disciplinam,
et projecisti sermones meos retrorsum.

VULC ¹⁸ Si videbas furem, currebas cum eo ;
et cum adulteris portionem tuam ponebas.

VULC ¹⁹ Os tuum abundavit malitia,
et lingua tua concinnabat dolos.

VULC ²⁰ Sedens adversus fratrem tuum loquebaris,
et adversus filium matris tuæ ponebas scandalum.

VULC ²¹ Hæc fecisti, et tacui.
Existimasti inique quod ero tui similis :
arguam te, et statuam contra faciem tuam.

VULC ²² Intelligite hæc, qui obliviscimini Deum,
nequando rapiat, et non sit qui eripiat.

VULC ²³ Sacrificium laudis honorificabit me,
et illic iter quo ostendam illi salutare Dei.]