VULC ¹ In finem. Psalmus David,

VULC ² cum venit ad eum Nathan propheta, quando intravit ad Bethsabee.

VULC ³ [Miserere mei, Deus, secundum magnam misericordiam tuam ;
et secundum multitudinem miserationum tuarum, dele iniquitatem meam.

VULC ⁴ Amplius lava me ab iniquitate mea,
et a peccato meo munda me.

VULC ⁵ Quoniam iniquitatem meam ego cognosco,
et peccatum meum contra me est semper.

VULC ⁶ Tibi soli peccavi, et malum coram te feci ;
ut justificeris in sermonibus tuis,
et vincas cum judicaris.

VULC ⁷ Ecce enim in iniquitatibus conceptus sum,
et in peccatis concepit me mater mea.

VULC ⁸ Ecce enim veritatem dilexisti ;
incerta et occulta sapientiæ tuæ manifestasti mihi.

VULC ⁹ Asperges me hyssopo, et mundabor ;
lavabis me, et super nivem dealbabor.

VULC ¹⁰ Auditui meo dabis gaudium et lætitiam,
et exsultabunt ossa humiliata.

VULC ¹¹ Averte faciem tuam a peccatis meis,
et omnes iniquitates meas dele.

VULC ¹² Cor mundum crea in me, Deus,
et spiritum rectum innova in visceribus meis.

VULC ¹³ Ne projicias me a facie tua,
et spiritum sanctum tuum ne auferas a me.

VULC ¹⁴ Redde mihi lætitiam salutaris tui,
et spiritu principali confirma me.

VULC ¹⁵ Docebo iniquos vias tuas,
et impii ad te convertentur.

VULC ¹⁶ Libera me de sanguinibus, Deus, Deus salutis meæ,
et exsultabit lingua mea justitiam tuam.

VULC ¹⁷ Domine, labia mea aperies,
et os meum annuntiabit laudem tuam.

VULC ¹⁸ Quoniam si voluisses sacrificium, dedissem utique ;
holocaustis non delectaberis.

VULC ¹⁹ Sacrificium Deo spiritus contribulatus ;
cor contritum et humiliatum, Deus, non despicies.

VULC ²⁰ Benigne fac, Domine, in bona voluntate tua Sion,
ut ædificentur muri Jerusalem.

VULC ²¹ Tunc acceptabis sacrificium justitiæ, oblationes et holocausta ;
tunc imponent super altare tuum vitulos.]