VULC ¹ In finem, ne disperdas. David in tituli inscriptionem.

VULC ² [Si vere utique justitiam loquimini,
recta judicate, filii hominum.

VULC ³ Etenim in corde iniquitates operamini ;
in terra injustitias manus vestræ concinnant.

VULC ⁴ Alienati sunt peccatores a vulva ;
erraverunt ab utero :
locuti sunt falsa.

VULC ⁵ Furor illis secundum similitudinem serpentis,
sicut aspidis surdæ et obturantis aures suas,

VULC ⁶ quæ non exaudiet vocem incantantium,
et venefici incantantis sapienter.

VULC ⁷ Deus conteret dentes eorum in ore ipsorum ;
molas leonum confringet Dominus.

VULC ⁸ Ad nihilum devenient tamquam aqua decurrens ;
intendit arcum suum donec infirmentur.

VULC ⁹ Sicut cera quæ fluit auferentur ;
supercecidit ignis, et non viderunt solem.

VULC ¹⁰ Priusquam intelligerent spinæ vestræ rhamnum,
sicut viventes sic in ira absorbet eos.

VULC ¹¹ Lætabitur justus cum viderit vindictam ;
manus suas lavabit in sanguine peccatoris.

VULC ¹² Et dicet homo : Si utique est fructus justo,
utique est Deus judicans eos in terra.]