VULC ¹ Psalmus David, cum esset in deserto Idumææ.

VULC ² [Deus, Deus meus, ad te de luce vigilo.
Sitivit in te anima mea ; quam multipliciter tibi caro mea !

VULC ³ In terra deserta, et invia, et inaquosa,
sic in sancto apparui tibi,
ut viderem virtutem tuam et gloriam tuam.

VULC ⁴ Quoniam melior est misericordia tua super vitas,
labia mea laudabunt te.

VULC ⁵ Sic benedicam te in vita mea,
et in nomine tuo levabo manus meas.

VULC ⁶ Sicut adipe et pinguedine repleatur anima mea,
et labiis exsultationis laudabit os meum.

VULC ⁷ Si memor fui tui super stratum meum,
in matutinis meditabor in te.

VULC ⁸ Quia fuisti adjutor meus,
et in velamento alarum tuarum exsultabo.

VULC ⁹ Adhæsit anima mea post te ;
me suscepit dextera tua.

VULC ¹⁰ Ipsi vero in vanum quæsierunt animam meam :
introibunt in inferiora terræ ;

VULC ¹¹ tradentur in manus gladii :
partes vulpium erunt.

VULC ¹² Rex vero lætabitur in Deo ;
laudabuntur omnes qui jurant in eo :
quia obstructum est os loquentium iniqua.]