VULC ¹ [Habet argentum venarum suarum principia,
et auro locus est in quo conflatur.

VULC ² Ferrum de terra tollitur,
et lapis solutus calore in æs vertitur.

VULC ³ Tempus posuit tenebris,
et universorum finem ipse considerat :
lapidem quoque caliginis et umbram mortis.

VULC ⁴ Dividit torrens a populo peregrinante
eos quos oblitus est pes egentis hominis, et invios.

VULC ⁵ Terra de qua oriebatur panis,
in loco suo igni subversa est.

VULC ⁶ Locus sapphiri lapides ejus,
et glebæ illius aurum.

VULC ⁷ Semitam ignoravit avis,
nec intuitus est eam oculus vulturis.

VULC ⁸ Non calcaverunt eam filii institorum,
nec pertransivit per eam leæna.

VULC ⁹ Ad silicem extendit manum suam :
subvertit a radicibus montes.

VULC ¹⁰ In petris rivos excidit,
et omne pretiosum vidit oculus ejus.

VULC ¹¹ Profunda quoque fluviorum scrutatus est,
et abscondita in lucem produxit.

VULC ¹² Sapientia vero ubi invenitur ?
et quis est locus intelligentiæ ?

VULC ¹³ Nescit homo pretium ejus,
nec invenitur in terra suaviter viventium.

VULC ¹⁴ Abyssus dicit : Non est in me,
et mare loquitur : Non est mecum.

VULC ¹⁵ Non dabitur aurum obrizum pro ea,
nec appendetur argentum in commutatione ejus.

VULC ¹⁶ Non conferetur tinctis Indiæ coloribus,
nec lapidi sardonycho pretiosissimo vel sapphiro.

VULC ¹⁷ Non adæquabitur ei aurum vel vitrum,
nec commutabuntur pro ea vasa auri.

VULC ¹⁸ Excelsa et eminentia non memorabuntur comparatione ejus :
trahitur autem sapientia de occultis.

VULC ¹⁹ Non adæquabitur ei topazius de Æthiopia,
nec tincturæ mundissimæ componetur.

VULC ²⁰ Unde ergo sapientia venit ?
et quis est locus intelligentiæ ?

VULC ²¹ Abscondita est ab oculis omnium viventium :
volucres quoque cæli latet.

VULC ²² Perditio et mors dixerunt :
Auribus nostris audivimus famam ejus.

VULC ²³ Deus intelligit viam ejus,
et ipse novit locum illius.

VULC ²⁴ Ipse enim fines mundi intuetur,
et omnia quæ sub cælo sunt respicit.

VULC ²⁵ Qui fecit ventis pondus,
et aquas appendit in mensura.

VULC ²⁶ Quando ponebat pluviis legem,
et viam procellis sonantibus :

VULC ²⁷ tunc vidit illam et enarravit,
et præparavit, et investigavit.

VULC ²⁸ Et dixit homini : Ecce timor Domini, ipsa est sapientia ;
et recedere a malo, intelligentia.]