VULC ¹ In finem, ne disperdas. David in tituli inscriptionem, cum fugeret a facie Saul in speluncam.

VULC ² [Miserere mei, Deus, miserere mei,
quoniam in te confidit anima mea.
Et in umbra alarum tuarum sperabo,
donec transeat iniquitas.

VULC ³ Clamabo ad Deum altissimum,
Deum qui benefecit mihi.

VULC ⁴ Misit de cælo, et liberavit me ;
dedit in opprobrium conculcantes me.
Misit Deus misericordiam suam et veritatem suam,

VULC ⁵ et eripuit animam meam de medio catulorum leonum.
Dormivi conturbatus.
Filii hominum dentes eorum arma et sagittæ,
et lingua eorum gladius acutus.

VULC ⁶ Exaltare super cælos, Deus,
et in omnem terram gloria tua.

VULC ⁷ Laqueum paraverunt pedibus meis,
et incurvaverunt animam meam.
Foderunt ante faciem meam foveam,
et inciderunt in eam.

VULC ⁸ Paratum cor meum, Deus, paratum cor meum ;
cantabo, et psalmum dicam.

VULC ⁹ Exsurge, gloria mea ;
exsurge, psalterium et cithara :
exsurgam diluculo.

VULC ¹⁰ Confitebor tibi in populis, Domine,
et psalmum dicam tibi in gentibus :

VULC ¹¹ quoniam magnificata est usque ad cælos misericordia tua,
et usque ad nubes veritas tua.

VULC ¹² Exaltare super cælos, Deus,
et super omnem terram gloria tua.]