VULC ¹ In finem, ne disperdas. David in tituli inscriptionem, quando misit Saul et custodivit domum ejus ut eum interficeret.

VULC ² [Eripe me de inimicis meis, Deus meus,
et ab insurgentibus in me libera me.

VULC ³ Eripe me de operantibus iniquitatem,
et de viris sanguinum salva me.

VULC ⁴ Quia ecce ceperunt animam meam ;
irruerunt in me fortes.

VULC ⁵ Neque iniquitas mea, neque peccatum meum, Domine ;
sine iniquitate cucurri, et direxi.

VULC ⁶ Exsurge in occursum meum, et vide :
et tu, Domine Deus virtutum, Deus Israël,
intende ad visitandas omnes gentes :
non miserearis omnibus qui operantur iniquitatem.

VULC ⁷ Convertentur ad vesperam, et famem patientur ut canes :
et circuibunt civitatem.

VULC ⁸ Ecce loquentur in ore suo,
et gladius in labiis eorum : quoniam quis audivit ?

VULC ⁹ Et tu, Domine, deridebis eos ;
ad nihilum deduces omnes gentes.

VULC ¹⁰ Fortitudinem meam ad te custodiam,
quia, Deus, susceptor meus es :

VULC ¹¹ Deus meus misericordia ejus præveniet me.

VULC ¹² Deus ostendet mihi super inimicos meos :
ne occidas eos, nequando obliviscantur populi mei.
Disperge illos in virtute tua,
et depone eos, protector meus, Domine :

VULC ¹³ delictum oris eorum, sermonem labiorum ipsorum ;
et comprehendantur in superbia sua.
Et de execratione et mendacio annuntiabuntur

VULC ¹⁴ in consummatione :
in ira consummationis, et non erunt.
Et scient quia Deus dominabitur Jacob, et finium terræ.

VULC ¹⁵ Convertentur ad vesperam, et famem patientur ut canes :
et circuibunt civitatem.

VULC ¹⁶ Ipsi dispergentur ad manducandum ;
si vero non fuerint saturati, et murmurabunt.

VULC ¹⁷ Ego autem cantabo fortitudinem tuam,
et exsultabo mane misericordiam tuam :
quia factus es susceptor meus,
et refugium meum in die tribulationis meæ.

VULC ¹⁸ Adjutor meus, tibi psallam,
quia Deus susceptor meus es ;
Deus meus, misericordia mea.]