Ps 96 (Vulgate)

¹ Huic David, quando terra ejus restituta est. [Dominus regnavit : exsultet terra ; lætentur insulæ multæ.
² Nubes et caligo in circuitu ejus ; justitia et judicium correctio sedis ejus.
³ Ignis ante ipsum præcedet, et inflammabit in circuitu inimicos ejus.
⁴ Illuxerunt fulgura ejus orbi terræ ; vidit, et commota est terra.
⁵ Montes sicut cera fluxerunt a facie Domini ; a facie Domini omnis terra.
⁶ Annuntiaverunt cæli justitiam ejus, et viderunt omnes populi gloriam ejus.
⁷ Confundantur omnes qui adorant sculptilia, et qui gloriantur in simulacris suis. Adorate eum omnes angeli ejus.
⁸ Audivit, et lætata est Sion, et exsultaverunt filiæ Judæ propter judicia tua, Domine.
⁹ Quoniam tu Dominus altissimus super omnem terram ; nimis exaltatus es super omnes deos.
¹⁰ Qui diligitis Dominum, odite malum : custodit Dominus animas sanctorum suorum ; de manu peccatoris liberabit eos.
¹¹ Lux orta est justo, et rectis corde lætitia.
¹² Lætamini, justi, in Domino, et confitemini memoriæ sanctificationis ejus.]