VULC ¹ [Fili mi, custodi sermones meos,
et præcepta mea reconde tibi.
Fili,

VULC ² serva mandata mea, et vives ;
et legem meam quasi pupillam oculi tui :

VULC ³ liga eam in digitis tuis,
scribe illam in tabulis cordis tui.

VULC ⁴ Dic sapientiæ : Soror mea es,
et prudentiam voca amicam tuam :

VULC ⁵ ut custodiant te a muliere extranea,
et ab aliena quæ verba sua dulcia facit.

VULC ⁶ De fenestra enim domus meæ
per cancellos prospexi,

VULC ⁷ et video parvulos ;
considero vecordem juvenem,

VULC ⁸ qui transit per plateam juxta angulum
et prope viam domus illius graditur :

VULC ⁹ in obscuro, advesperascente die,
in noctis tenebris et caligine.

VULC ¹⁰ Et ecce occurrit illi mulier ornatu meretricio,
præparata ad capiendas animas :
garrula et vaga,

VULC ¹¹ quietis impatiens,
nec valens in domo consistere pedibus suis ;

VULC ¹² nunc foris, nunc in plateis,
nunc juxta angulos insidians.

VULC ¹³ Apprehensumque deosculatur juvenem,
et procaci vultu blanditur, dicens :

VULC ¹⁴ Victimas pro salute vovi ;
hodie reddidi vota mea :

VULC ¹⁵ idcirco egressa sum in occursum tuum,
desiderans te videre, et reperi.

VULC ¹⁶ Intexui funibus lectulum meum ;
stravi tapetibus pictis ex Ægypto :

VULC ¹⁷ aspersi cubile meum myrrha,
et aloë, et cinnamomo.

VULC ¹⁸ Veni, inebriemur uberibus,
et fruamur cupitis amplexibus donec illucescat dies.

VULC ¹⁹ Non est enim vir in domo sua :
abiit via longissima :

VULC ²⁰ sacculum pecuniæ secum tulit ;
in die plenæ lunæ reversurus est in domum suam.

VULC ²¹ Irretivit eum multis sermonibus,
et blanditiis labiorum protraxit illum.

VULC ²² Statim eam sequitur quasi bos ductus ad victimam,
et quasi agnus lasciviens,
et ignorans quod ad vincula stultus trahatur :

VULC ²³ donec transfigat sagitta jecur ejus,
velut si avis festinet ad laqueum,
et nescit quod de periculo animæ illius agitur.

VULC ²⁴ Nunc ergo, fili mi, audi me,
et attende verbis oris mei.

VULC ²⁵ Ne abstrahatur in viis illius mens tua,
neque decipiaris semitis ejus ;

VULC ²⁶ multos enim vulneratos dejecit,
et fortissimi quique interfecti sunt ab ea.

VULC ²⁷ Viæ inferi domus ejus,
penetrantes in interiora mortis.]